ପାଦରେ ଲେଖି ମାଟ୍ରିକ୍ ପାସ୍ କଲେ ମାଲକାନଗିରିର ଝିଅ, ସମଗ୍ର ଓଡ଼ିଶା ପାଇଁ ସାଜିଲେ ପ୍ରେରଣା
ମାଲକାନଗିରି,2|5(ଭାଗ୍ୟ ପ୍ରଣେତା)-ଶାରୀରିକ ଅସୁବିଧା କେବେବି ମନୋବଳକୁ ରୋକି ପାରେନାହିଁ—ଏହାକୁ ସତ୍ୟ ପ୍ରମାଣ କରିଛନ୍ତି ମାଲକାନଗିରି ଜିଲ୍ଲାର ଛାତ୍ରୀ ଲକ୍ଷ୍ମୀ ଖିମୁଣ୍ଡୁ। ଜନ୍ମରୁ ଦୁଇ ହାତର ସୀମିତ ବ୍ୟବହାର ସତ୍ତ୍ୱେ ସେ ପାଦରେ ଲେଖି ୨୦୨୬ ମାଟ୍ରିକ୍ ପରୀକ୍ଷାରେ ସଫଳତା ହାସଲ କରିଛନ୍ତି। ଲକ୍ଷ୍ମୀ ସିନ୍ଧ୍ରିମାଳ ସ୍ଥିତ ପିଏମ୍ ଶ୍ରୀ ସରକାରୀ ଉଚ୍ଚ ବିଦ୍ୟାଳୟର ଛାତ୍ରୀ। ସେ ବୋର୍ଡ ଅଫ୍ ସେକେଣ୍ଡାରି ଏଡ୍ୟୁକେସନ୍ (BSE), ଓଡ଼ିଶା ଆୟୋଜିତ ହାଇସ୍କୁଲ୍ ସର୍ଟିଫିକେଟ୍ ପରୀକ୍ଷାରେ ଅଂଶଗ୍ରହଣ କରି D ଗ୍ରେଡ୍ ସହ ପାସ୍ କରିଛନ୍ତି।
ପରୀକ୍ଷା ସମୟରେ ତାଙ୍କୁ ସ୍କ୍ରାଇବର (ଲେଖକ) ସୁବିଧା ଯୋଗାଇ ଦିଆ ଯାଇଥିଲେ ମଧ୍ୟ, ଲକ୍ଷ୍ମୀ ନିଜ ପାଦରେ ସ୍ୱୟଂ ଲେଖି ପରୀକ୍ଷା ଦେବାକୁ ନିଷ୍ପତ୍ତି ନେଇଥିଲେ। ଏହା ତାଙ୍କ ଆତ୍ମବିଶ୍ୱାସ ଓ ଦୃଢ଼ ସଙ୍କଳ୍ପର ପ୍ରମାଣ।
ବର୍ଷରୁ ବର୍ଷ ଅଭ୍ୟାସ ଦ୍ୱାରା ସେ ପାଦରେ ଲେଖିବାର କୌଶଳ ଗଢ଼ି ଉଠିଥିଲେ। ନିଜ ଅସମର୍ଥତାକୁ ଦୁର୍ବଳତା ଭାବିବା ପରିବର୍ତ୍ତେ ସେ ତାହାକୁ ଚ୍ୟାଲେଞ୍ଜ୍ ଭାବେ ନେଇ ସଫଳତା ହାସଲ କରିଛନ୍ତି।
ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣିଗ୍ରାହୀ ଲକ୍ଷ୍ମୀଙ୍କ ସଫଳତାକୁ ପ୍ରଶଂସା କରି କହିଛନ୍ତି, “ଏହା ସମଗ୍ର ଶିକ୍ଷା ବ୍ୟବସ୍ଥା ପାଇଁ ଗର୍ବର ବିଷୟ। ଶାରୀରିକ ଅସକ୍ଷମତା କେବେବି ଛାତ୍ରଛାତ୍ରୀଙ୍କ ସମ୍ଭାବନାକୁ ନିର୍ଦ୍ଧାରଣ କରିପାରେନାହିଁ।”
ଫଳ ପ୍ରକାଶ ପରେ ଲକ୍ଷ୍ମୀଙ୍କ ଗାଁ ଓ ଆସପାସ ଅଞ୍ଚଳରେ ଖୁସିର ଲହରୀ ଦେଖାଯାଇଛି। ତାଙ୍କ ଏହି ସଫଳତା ଅନେକଙ୍କ ପାଇଁ ସାହସ, ସଂଘର୍ଷ ଓ ପ୍ରେରଣାର ପ୍ରତୀକ ହୋଇଛି।
Comments
Post a Comment