ବେଲଗାମ ଦରବୃଦ୍ଧିରେ ଅଙ୍ଗନବାଡ଼ି ପୋଷଣ ଯୋଜନା ଚାପରେ
ଅନୁଦାନ ବଢ଼ିଲେ ବି ଚିନ୍ତା କମୁନି; ୩୯୦ କେନ୍ଦ୍ରରେ ପୁଷ୍ଟିକର ଖାଦ୍ୟ ଯୋଗାଣ ବଡ଼ ଚ୍ୟାଲେଞ୍ଜ
ରାଉରକେଲା,25|7(ଭାଗ୍ୟ ପ୍ରଣେତା)-ବଜାରରେ ଲଗାତାର ବଢ଼ୁଥିବା ଖାଦ୍ୟଦ୍ରବ୍ୟର ଦରଦାମ ରାଉରକେଲାର ଅଙ୍ଗନବାଡ଼ି କେନ୍ଦ୍ରଗୁଡ଼ିକରେ ଶିଶୁମାନଙ୍କ ପାଇଁ ପୁଷ୍ଟିକର ଖାଦ୍ୟ ପ୍ରସ୍ତୁତିକୁ ଗୁରୁତର ଭାବେ ପ୍ରଭାବିତ କରିଛି। ରନ୍ଧନ ଗ୍ୟାସ, ଡାଲି, ଖାଦ୍ୟ ତେଲ, ଅଣ୍ଡା, ପନିପରିବା ଓ ଅନ୍ୟାନ୍ୟ ଆବଶ୍ୟକ ସାମଗ୍ରୀର ଦର ଦ୍ରୁତ ହାରରେ ବଢ଼ୁଥିବା ବେଳେ ସରକାରୀ ଅନୁଦାନ ସେହି ଅନୁପାତରେ ବୃଦ୍ଧି ନ ହେବାରୁ ଅଙ୍ଗନବାଡ଼ି କର୍ମୀମାନେ ନିର୍ଦ୍ଧାରିତ ମେନ୍ୟୁ ଅନୁଯାୟୀ ଖାଦ୍ୟ ଯୋଗାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି।
ରାଉରକେଲା ସମନ୍ୱିତ ଶିଶୁ ବିକାଶ ପ୍ରକଳ୍ପ ଅଧୀନରେ ପ୍ରାୟ ୩୯୦ଟି ଅଙ୍ଗନବାଡ଼ି କେନ୍ଦ୍ର କାର୍ଯ୍ୟରତ ଥିବାବେଳେ ୨,୫୦୦ରୁ ଅଧିକ କୋମଳମତି ଶିଶୁ ପ୍ରତିଦିନ ଏହି କେନ୍ଦ୍ରଗୁଡ଼ିକରୁ ପୁଷ୍ଟିକର ଖାଦ୍ୟ ପାଉଛନ୍ତି। କିନ୍ତୁ ଦରବୃଦ୍ଧି ଯୋଗୁଁ ଏହି ଯୋଜନାକୁ ସଫଳ ଭାବେ ପରିଚାଳନା କରିବା ଦିନକୁ ଦିନ କଷ୍ଟକର ହୋଇପଡ଼ୁଛି।
ସୂଚନା ଅନୁସାରେ, ୬ ମାସରୁ ଅଧିକ ବୟସର ଶିଶୁମାନଙ୍କ ମଧ୍ୟରୁ ପ୍ରାୟ ୧୦ ପ୍ରତିଶତ ରକ୍ତହୀନତା ଏବଂ ୫ ପ୍ରତିଶତ ଶିଶୁଙ୍କ ଉଚ୍ଚତା ବୟସ ଅନୁଯାୟୀ କମ୍ ଥିବା ଦେଖାଯାଇଛି। ସେହିପରି ପ୍ରତି ୧,୦୦୦ ଶିଶୁରେ ୧୦୦ରୁ ଅଧିକ ଆଦିବାସୀ ଶିଶୁଙ୍କ ଶାରୀରିକ ଓ ବୌଦ୍ଧିକ ବିକାଶ ଆଶାନୁରୂପ ହେଉନଥିବା ଅଭିଯୋଗ ମଧ୍ୟ ଉଠିଛି। ଏଭଳି ସ୍ଥିତିରେ ଗୁଣାତ୍ମକ ପୋଷଣର ଆବଶ୍ୟକତା ଆହୁରି ବଢ଼ିଥିବା ବେଳେ ଆର୍ଥିକ ସଙ୍କଟ ଚିନ୍ତା ବଢ଼ାଇଛି।
ଅଙ୍ଗନବାଡ଼ି କର୍ମୀମାନଙ୍କ କହିବା ଅନୁଯାୟୀ, ପୂର୍ବରୁ ପ୍ରାୟ ₹୯୦୦–₹୯୫୦ ମଧ୍ୟରେ ମିଳୁଥିବା ଘରୋଇ ଏଲପିଜି ସିଲିଣ୍ଡର ବର୍ତ୍ତମାନ ₹୧,୦୦୦–₹୧,୧୦୦ ଟଙ୍କାରେ ପହଞ୍ଚିଛି। ସୋରିଷ ତେଲ ଲିଟର ପିଛା ₹୧୭୦–₹୧୮୦, ମୁଗ ଡାଲି ₹୧୩୦–₹୧୪୦, ତୁଅର ଡାଲି ₹୧୬୦–₹୧୮୦ ଟଙ୍କାରେ ବିକ୍ରି ହେଉଛି। ଆଳୁ, ଟମାଟୋ, ପିଆଜ ସମେତ ବିଭିନ୍ନ ପନିପରିବାର ଦର ମଧ୍ୟ ୨୦ରୁ ୪୦ ପ୍ରତିଶତ ପର୍ଯ୍ୟନ୍ତ ବଢ଼ିଛି। କ୍ଷୀର, ମସଲା ଓ ଅନ୍ୟାନ୍ୟ ରନ୍ଧନ ସାମଗ୍ରୀର ଦର ମଧ୍ୟ ଲଗାତାର ବୃଦ୍ଧି ପାଉଛି।
ସରକାରୀ ମେନ୍ୟୁ ଅନୁଯାୟୀ ସୋମବାର ଡାଲମା, ମଙ୍ଗଳବାର, ବୁଧବାର ଓ ଶନିବାର ଗୋଟିଏ ସିଝା ଅଣ୍ଡା ସହ ତରକାରୀ ଏବଂ ଅନ୍ୟ ଦିନଗୁଡ଼ିକରେ ଖେଚୁଡ଼ି, ସୁଜି ଓ ଅନ୍ୟାନ୍ୟ ପୁଷ୍ଟିକର ଖାଦ୍ୟ ଦିଆଯିବାର ବ୍ୟବସ୍ଥା ରହିଛି। କିନ୍ତୁ ବଜାରରେ କଞ୍ଚା ଅଣ୍ଡାର ଦର ହିଁ ୭ ଟଙ୍କା ଥିବା ବେଳେ ସିଝା ଅଣ୍ଡାର ଦର ଆହୁରି ଅଧିକ। ଏଭଳି ସ୍ଥିତିରେ ଅଣ୍ଡା ସହ ତରକାରୀ ପ୍ରସ୍ତୁତ କରିବା କର୍ମୀମାନଙ୍କ ପାଇଁ କଷ୍ଟସାଧ୍ୟ ହୋଇପଡ଼ିଛି। ସେହିପରି ଡାଲି ଓ ପନିପରିବାର ଦର ବୃଦ୍ଧି ଯୋଗୁଁ ନିର୍ଦ୍ଧାରିତ ବ୍ୟୟରେ ଗୁଣାତ୍ମକ ଡାଲମା ପ୍ରସ୍ତୁତ କରିବା ମଧ୍ୟ ସମ୍ଭବ ହେଉନାହିଁ।
Comments
Post a Comment